البقاء مع زوجي ولا الماجيستير ...

[maser]

انا طبيبة .. في فترة النيابة ... وزوجي طبيب ايضا ... ولاننا في بداية زواجنا ... ومسئوليات الزواج وديونه واقساطه وعشان الواحد يعيش حياة نقدر نقول كريمة اللي مش ممكن تكون متوفرةفي مصر غير مع مساعدة الأهل...
اضطر زوجي للعمل في احدي دول الخليج ... وانا ذهبت معه في اجازة مرافق زوج .....

ولكن المشكلة اني مسجلة ماستر تبع الوزارة ... ولازم حضور عشان دخول الامتحان ولازم شغل وتدريب عشان تحسين المستوي خصوصا اني لسة في بداية النيابة ..
وطبعا احنا عارفين دلوقتي في شروط الماجيستير تبع الوزارة ممنوع الاجازات ولا حتي مرافق زوج او رعاية طفل يا اما تلغي ترشيحك من الوزارة ... وحتي سنة التفرغ مناخدهاش الا بعد النجاح في الفرست وظهور الشهادة وده بياخد وقت كتير اوي ......

قررت اني اقطع الأجازة وارجع مصر لاني حسيت بالضياع واني طول ما انا قاعدة في البيت عمر ما مستوايا هايتحسن وطول ما انا برة مصر عمري ما هادخل الامتحان ... وصعب اوي ان الواحد يشوف احلامه بتضيع كلها قدامه ويحس انه فاشل ...

بس لما خدت القرار لقيت زوجي مكتئب جدا وحالته النفسية تدهورت وحسيت انه مش هايقدر يكمل من غيري ومش هايقدر يتحمل الغربة لوحده ... صعب عليا جدا بس في نفس الوقت صعبانة عليا نفسي وانا شخصيتي اني بحب اكون مجتهدة واحقق نفسي في الشغل ....
وانا اجلت دخول الامتحان سنة ... صعب اوي عليا ااجل تاني بس في نفس الوقت محتارة .... اختار البقاء مع زوجي ومساعدته في غربته ولا ارجع و اشوف شغلي ودراستي ...؟؟؟؟؟؟ظ

زوجي بصراحة ظاهريا بيشجعني اني اكمل دراسة ويقولي بردو لازم تشوفي مصلحتك ومستقبلك لانه متفق معايا من ايام الخطوبة انه مش هيقف في طريقي او يكون السبب في تأخيري ..
بس من جواه انا حاسة بيه زعلان جدا ... ونفسيته سائت جدا لأني هسيبه ...
محتارة افيدوني بأرائكم ... اكيد هاتفيدني اني اخد القرار ......

[Dr.ahmoda_for_ever]

طب مترجعوا مع بعض يا دكتوره عشان امتحانك

وبعدين تسافروا تانى ؟؟؟

[dr_hesham13]

مشكلتك هى مشكله 90% من شباب الاطباء
بس القرار صعب جدا من حق جوزك ان يحس باستقرار وحد يهون عليه بهدله الغربه واظن صعب يرجع وتكملو هنا الماستر وتسافرو لان زى مبتقولى عليكم التزامات ماديه وفى نفس الوقت حرام تضيعى الماستر لان لو كسلتى الفتره دى هتكسلى طول العمر والمسؤليات هتذيذ
بصراحه مش عارف غير اقول ربنا ياخدهم فى وزراه الصحه ال مش عارفين يرفعو المرتبات علشان الناس تعرف تعيش ابسط درجات الحياه الكريمه فى بلدها

[د أحمد سمير]

خليكى معاه و مترجعيش

ده رأيى

[amkas007]

زوج حضرتك اولى يادكتوره ..بيتك هو الي باقيلك في الدنيا كلها

محدش واخد حاجه من الشغل ..خصوصا في دوله متقدمه تشجع العلم زي مصر

[mmfriend]

يا دكتوره انا طبيب برضه ومتغرب برضه

بس انا اصلا اعزب

ومش قادر اقولك اد ايه الحياه مش حلوه والواحد لوحده

ده بالنسبه لواحد اعزب فمابالك بقي بزوج حضرتك هيعمل ايه لوحده وهو الى كان متعود على الحياه الزوجيه والراحه والسعاده !!!!

انا رايي لو تحاولى تأجلى كمان سنه يبقي افضل وافضل

او لو تحاولى تاخدى اى شهاده وانتى بره زى mrcp , mrcs

ولو الفيرست حتى

وربنا يكتبلك التوفيق

[pharmacistina88]

وصعب اوي ان الواحد يشوف احلامه بتضيع كلها قدامه ويحس انه فاشل ...

صحيح عندك حق ..

يعني ما ينفعش الزوج يضحي مرة ؟؟!!

مش هو قال هيشجعلك و مش هيقف في طريق تعليمك ؟؟

المسألة قد لا تكون مسألة شغل قد ما هي مسألة طموح , ان الواحدة تحس ان هي اتعلمت و ان ليها معنى في الدنيا ..

مشكلتك نفس مشكلة أختي ,

زوجهها عايزها تسافر , و ماما زعلانة و بتقولها خلاص هتنسي مستقبلك يا دكتورة .. ياعيني مهيش عارفة تعمل ايه ..

أنا رأيي ان الزوج يجي على نفنسه شوية .. فيها ايه لما يستحمل سنة ؟؟

يعني نفترض انه ماكانش متزوج , عادي يعني الحياة ماشية .. حياة صعبة بس ماشية ..

لو أنا منك أسافر عادي و هو هيتعود و المفروض يقدر ظروفك برده ..

وفقك الله

[raghda]

ارجعي مصر وخلصي الماجستير
انتهزي اي فرصه اجازه للسفر لزوجك ععشان تقطعي المده الطويله الي هتغيبيها
انجزي بسرعه وارجعيله
معلش هتتعبوا شويه بس عشان ماتندميش لانك كده مش هتقدري تكوني راضيه عن نفسك وبالتالي هتحسي انك متنازله عن مستقبلك عشان خاطره ويمكن ده يوتر علاقتكم ببعض

[ahmadyousef]

بلا ماجستير بلا هبل البيت اولي
وبعدين يعني اللي خدوا الماجستير قبلك من الطبيبات ولم يتزوجوا عملوا بيه ايه

[elsharkawe]

حاولى توفقى بين الاتنين

يعنى هوا كده كده هينزل اجازه سنويه هيبقى فيها مع حضرتك

وممكن يعملك زياره تلت اربع شهور فى وسط السنه

لحاد اما تخلصى الماجستير