عيادة الأسنان

[ندى مصطفى]

سلامو عليكم انا عايزة استفسر عن حاجة؟
هل البينج بتاع الاسنان امن في فترة الحمل وللا لأ ؟
علما بانني في الشهر الثامن وصف اسنانى اللي فوق شمال ويمين فبهم الم واللي تحت شمال واديلي على الحالة دي 4 اشهور

[meso_meso]

أنا عندي ال1st molar اتكسر منه حته ودلوقتي بيوجعني ولازم اخد مسكن مش عارف اعمل ايه وايه اللي مممكن دكتور السنان يعمله

[meso_meso]

أرجو حد يرد قريبا لان واضح ان عيادة الاسنان نايمة

[حسام رفعت فرغلى]

يا دكاترة
أى حد ...
المهم تفيدونى

تبدأ حكايتى لما ضرسى التانى و التالت وجعونى
رحت للدكتور قالى انت عندك حالة فريدة غير طبيعية ألا و هى :
الضرسين التانى و التالت ورا بعض مش جنب بعض واحد قدام و واحد ورا ده فى الجانبين http://www.medicalto.com/21160
المهم : قالى عاوزين يتحشو " الضرسين "
قلتلوا : اتكل على الله
آم هو متكل على الله http://www.medicalto.com/78054
وبعد الحشو المؤقت و الدائم بدأ ألم رهيب مكان الحشو لما أشرب حاجة سواء ساقعة او سخنة و بالذات الحاجة الساقعة حتى المية نفسها تعملى الم شديد جدا" " مش عارف أشرب يا دكاترة ... مش كده حرام ... و الله حرام "
المهم : رحت للدكتور تانى و قلتلوا ع الوجع ... بس مكنتش مدرك وقتها انه مكان الحشو ، كنت مفكره فى احد الضرسين
قعد يدق ع الدرسين لما قربوا يتخلعوا و انا مش حاسس بحاجة http://www.medicalto.com/83627
قالى الوجع اللى انت بتقول عليه ده ميخلكش تستحمل الخبط ده
انت بتستعبط
بقيت هعيط ... بستعبط علشان مشربش ميه ( جديدة دى )
المهم : بعد عناء و طريق طويل من الحديث لاقناعه انى ساعات حتى مش بعرف انام من الوجع ده لانه ساعات بيجى فجأة كده
كتبلى على حقنة ( فلوموكس ) و قالى لما يتعبك بالليل خد مسكن ( كيتوفان )
وأخدت الحقنة بعد عذاب .. و ضاعت فرحة العيد و اللحمة فى الحقن ( مع العلم كرهى الشديد للحقن )و ع التريقة اللى شوفتها و أخدتها من دكاترة الصيدلية ( دكتور و بيكره الحقن .... ها ها ها ها ها ها هااااااااااااا .... )
http://www.medicalto.com/25814

المهم : ظل الحال على ما هو عليه
و لسه مش بعرف اشرب ميه و ساعات مش بعرف انام و انا حسيت ان الدكتور ده هو اللى بيتعبنى ... ف مروحتش عنده تانى
أرجوكم حد يقولى أعمل ايه !!؟؟؟؟؟؟؟؟؟؟؟؟؟؟؟؟؟؟

http://www.medicalto.com/69984

بالتأكيد يا دكتور انت عندك مشكلة ومش ممكن تكون بتدعى الألم والمشكله اللى عندك بالتأكيد سببها ان التسوس اللى عندك بالتأكيد كان قريب من العصب ولازم كان يتعملك عازل تحت الحشو علشان ما تحسش بالبارد والسخن لأن البلاتين معدن موصل جيد للحرارة بيوصل الحرارة سواء بارده أو ساخنه للعصب وده اذا كان الألم مع البارد والحار أما اذا كان بيجيلك ألم مستمر بالليل فده معناه ان الضرس محتاج حشو عصب بس المؤكد انك حرام تفضل فى العذاب اللى انت فيه ده وبعدين اذا كان بيقولك انك معندكش حاجه ليه كتبلك فلومكس وايه فايدة الفلومكس أصلا فى حاله زى بتاعتك دى

[حسام رفعت فرغلى]

[QUOTE=greyzone;297967]أنا عندى استفسار

أنا خلعت الضرسين العلويين رقم 6 اليمين و الشمال من مدة

باعرف اكل طبيعى و الحمد لله
شوف حضرتك من الأفضل طبعا انك تعمل تركيبات ثابته bridgesوتكون من نوع كويس يعنى ماتسترخصش لأن كل ما كانت التركيبات من نوعيه جيده كل ماده هيفرق معاك انت .
ليه بقى لازم تعمل لأن الدينامكيه بتاعت الفكين بتتخلبط بمعنى ان الأسنان اللى قبل السن المخلوع وبعده بتتحرك بعد فترة علشان تسد الفراغ اللى خلفه الضرس المخلوع كمان السن المقابل بيتحرك الى أعلى أيضا وده بيعمل مشاكل لأن الضروس دى لما بتتحرك بتسيب فراغ بينها وبين الضروس اللى جنبها وبيدخل فيها الأكل ويعمل تسوس الى جانب الضرس السفلى المقابل لما بيتحرك لأعلى بيظهر جزء من الجذر وده بيكون حساس للبارد والحار كمان بعد كده بيبقى الفراغ المتاح لعمل ضرس بديل بيبقى صغير ويصعب عمل جسر فى هذه الحاله

[حسام رفعت فرغلى]

ممكن استفسار
انارائحه فمى مش بتبقى حلوه لما بصحى من النوم
واحيانا فى بعض الايام اثناء النهار بتبقى رائحه فمى وحشه
رغم انى بغسل اسنانى
واحيانا وانا نايمه ممكن ينزل لعاب على المخدة ودى حاجه بتخنقنى جدااااااااااااااااااااااااااااااااااااااااا وسالت الدكتور قالى ممكن من البطن
عملت تحليلات ورحت لدكتور باطنه قالى تحليلاتى نظيفه جدا ومافيهاش حاجه
ياريت حديفيدنى بجد لان نفسيتى بقت فى الارض

شوفى حضرتك يا دكتوره بالنسبه للرائحه الكريهه غالبا بيكون سببها حاجه من أربعه:
1- وجود جير على الأسنان وده لازم ازالته عند دكتور الأسنان
2- وجود فجوات فى الأسنان نتيجه وجود تسوس أو كسر بالسن وده بيخلى الأكل يتراكم فى المكان ده ويتخمر ويعمل ريحه مش حلوه ودى لازم تتنضف ويتحط حشو مكانها
3- وجود نزف باللثه نتيجة فقر الدم أو التهاب فى اللثه
4- أحيانا بزوغ ضرس العقل فى الفك بيكون مصحوب بلحمية على الضرس بيدخل تحتها الأكل ويعمل ريحه مش حلوة
أما بالنسبه للعاب اللى بينزل على المخده فده غالبا نتيجة مشكله عندك فى التنفس عن طريق الأنف نتيجة اعوجاج فى الحاجز الأنفى أو لحميه وبتضطرى تتنفسى عن طريق الفم وطبيعى لما تفتحى فمك وانتى نايمه اللعاب بيخرج بره

[حسام رفعت فرغلى]

سؤال مهم جدااا لأطباء الأسنان عامة والتقويم خاصة
يا جماعة دلوقتي انا عايزة استشارة ضرووووووووووري جدااااااا لأطباء التقويم

انا عارف وحدة فكها السفلي والعلوي صغير وديق عملت قبل فترة تقويم للفك العلوي بغرض التوسعة اولا قم التصفيف لكن الفك العلوي عندها مصفف وكويس لكن كان ينقصه التوسيع وبعض اللمسات الأخيرة


دلوقتي التقويم من فوق معروف لكن المشكلة في التقويم اللي في الفك السفلي
الفك السفلي عندها معوج من الجنبين من أول ضرس اللي هم الضواحك لغاية الضرس القبل الأخير يعني الضرس التالت داخلين لجوة يعني الفك من تحت عامل زي مثلث للخارج عريض من الآخر وضيق في الوسط وعامل قمة من الأمام وده مخلي الفك بارز شوية عن المعدل الطبيعي


حاليا هية حطت بداية القطع البلاستيكية بين الأضراس الثاني والثالث والثالث والرابع للتوسيع عشان الحلقات المعدنية تتحط في الضرس الثاني من الفك يعني دول القواعد الأساسية للتقويم في البداية

المشكلة بقى انو الدكتور بقول انو ففي احتمالين للأسنان قبل ما يبتدي شغل التقويم بالزبط
اول احتمال انها لازم تخلع اضراس الضواعك يعني ضرسين م الأمام أو أربع أضراس على ذمة الدكتور


الاحتمال التاني انو يتم برد الأسنان من أطرافها بمعدل انش واحد من كل جهة وبالتالي الأسان هيغرو كتير كل ده عشان يتم التوسعة لتصفيف الأسنان


سؤالي ... هل الطريقة دي سليمة ؟؟؟!!!
ومادام التقويم هياخد وضعو من الأساس ويتم توسعة الأربع أضراس اللي داخلين لجوة من خلال التقويم من الجهتين يبقى ايه داعي البرد في الحالة دي؟؟ وهل الطريقة دي سليمة فعلا ولا في طرق أخرى لإصلاح الأسنان ؟؟؟


والف شكر ليكم

لازم قبل ما أعمل تقويم أخد مقاس للفكين وأعمل أشعة بانوراما عشان أبقى عارف الفراغ اللى أنا محتاجه عشان أحرك الأسنان فيه وبناء على ذلك بقرر أخلع ولا ما أخلعش ولا أعمل برد للأسنان ولو ان أنا شخصيا ما بفضلوش فلازم أحسب مساحة الفك كام ومحتاج مساحه قد ايه وفى طريقة تانيه انى بخلع ضروس العقل وبحرك الأسنان للخلف بس اللى بيقرر هو الدكتور حسب كل حالة

[حسام رفعت فرغلى]

يا جماعة انا كنت عايزة اعمل تقويم لان عندى ف الصف العلوى سنتين معوجين جنب بعض هم اللى جنب الناب العلوى ف اليسار هل التقويم ينفع معاهم ولا تقويم جراحى ويريت لو حد ينصحنى بدكتور اسنان امين اروحله انا من الزقازيق فارجوكم لو عد يعرف دكتور اسنان كويس يقولى ويقولى التكلفة كام

جزاكم الله كل خير
منتظرة الرد

طبعا ينفع معاهم يا دكتورة لأن التقويم فى الأسنان ينفع فى أى سن أما التقويم فى العظم له سن معين اذا ما اتعملش فيه بيحتاج بعد كده تقويم جراحى أما بالنسبة لحالتك فده تقويم فى الأسنان
بالنسبه للدكتور اللى تعملى عنده شوفى أى حد من اللى بيشتغلوا فى جامعة المنصورة فى عندكم فى الزقازيق أكتر من واحد

[حسام رفعت فرغلى]

سلامو عليكم انا عايزة استفسر عن حاجة؟
هل البينج بتاع الاسنان امن في فترة الحمل وللا لأ ؟
علما بانني في الشهر الثامن وصف اسنانى اللي فوق شمال ويمين فبهم الم واللي تحت شمال واديلي على الحالة دي 4 اشهور

هو يفضل عدم اجراء أى شئ فى الشهور الثلاثه الأولى من الحمل أما بعد كده فا مفيش مشكله بس فيه نوعين من البنج with adrenaline&without adrenalineبالنسبه للحامل بتاخد without adrenalineيعنى تقدرى حضرتك تحشى أسنانك بدون خوف اذا كانت بتؤلمك

[حسام رفعت فرغلى]

أنا عندي ال1st molar اتكسر منه حته ودلوقتي بيوجعني ولازم اخد مسكن مش عارف اعمل ايه وايه اللي مممكن دكتور السنان يعمله

مفيش مشكله يا دكتور حضرتك لازم تروح لدكتور الأسنان عشان يعوض الجزء اللى انكسر بالحشو وما تكسلش لأن الجزء اللى انكسر ده ممكن يحصل فيه تسوس ويوصل للعصب بسرعه ويعملك ألم شديد جدا وساعتها الضرس هيحتاج حشو عصب